İyul ayının 19-da Lənkəran şəhərində Lənkəran Şəhər İcra Hakimiyyətinin başçısı cənab Taleh Qaraşovun təşəbbüsü və deputat Rüfət Quliyevin təşkilatçılığı ilə bakılı və yerli sahibkarların işgüzar görüşü keçirilib. Heydər Əliyev Mərkəzində keçirilən görüşdə 60-a yaxın sahibkar və KİV nümayəndələri iştirak edib.

Görüşü giriş sözü ilə açan Milli Məclisin İqtisadi, siyasət, sənaye və sahibkarlıq komitəsinin üzvü, iqtisad elmləri doktoru, professor Rüfət Quliyev son illərdə ölkədə möhtərəm Prezidentimiz cənab İlham Əliyevin rəhbərliyi altında aparılan uğurlu iqtisadi kursun reallaşmasında kiçik və orta biznesin mühüm rolundan ətraflı bəhs edib, ölkə rəhbərinin bu sahənin inkişafına verdiyi böyük önəmi, ölkədə sahibkarlığın genişlənməsi üçün yaradılan münbit zəmini, qəbul edilən çoxsaylı qərarları xüsusilə vurğulayıb.
Lənkəran rayonunda da sahibkarlığın genişlənməsinə xüsusi diqqət yetirildiyini qeyd edən deputat bildirib ki, bugünkü görüşün keçirilməsi Şəhər İcra Hakimiyyətinin başçısı cənab Taleh Qaraşovun kiçik və orta biznesin inkişafına hərsahəli qayğısının bariz faktıdır.
Rüfət Quliyev görüşün məqsədini açıqlayaraq nəzərə çatdırıb ki, bura yığışan sahibkarlar geniş fikir mübadiləsi aparıb, bir-birlərinə qarşılıqlı kömək məsələlərini, yeni sahə və filialların yaradılması barədə fikirlərini bölüşməli, qazandıqları uğurlar və rastlaşdıqları çətinlikləri də müzakirə etməlidirlər.
Bakıdan təşrif buyurmuş sahibkarların fəaliyyət sahələri barədə məlumat WeClub-un rəhbəri İradə xanım Zeynalova tərəfindən verildikdən sonra qonaqlarla yerli sahibkarların ətraflı tanışlığı baş tutub.
Bundan sonra fikir mübadilələri ətrafında müzakirələr başlanıb.

Müzakirələrdə çıxış edən “Cənub Aqrar” MMC-nin rəhbəri Emin Cəbizadə, “Bağçam uşaq bağçaları”nın rəhbəri Samirə Muxtarova, “Astara Çay” MMC-nin rəhbəri Şirqasım Məmmədov, “Bakı Tourist Hostinq Offise”nin icraçı directoru Tərlan Yusubov, “Diamond Hotel”inin nümayəndəsi Samir Məmmədov, sahibkar Elyar Cəfərov, “Kiçik Qızılağac Balıqartırma” müəssisəsinin rəhbəri Dadaş Abasov, "AFTF Consulting"in rəhbəri Ələviyyə Həsənova, “Life Guard” şirkətinin directoru Orxan Qasımov, “ABV Plus” şirkətinin nümayəndəsi Elşən Səfərov, Lənkəran Şəhər İcra Hakimiyyətinin sektor müdiri Mikayıl Cəfərzadə, “Lənkəran” qəzetinin redaktoru Əlimardan Əliyev və başqaları sahibkarlıq xüsusilə də kiçik və orta sahibkarlığın inkişafından geniş danışıb, uyğun sahələrin bir-birinə qarşılıqlı kömək imkanlarını qeyd ediblər. Gələcək əlaqələr üçün vizit kartları mübadiləsi edən sahibkarlar tədbirin böyük əhəmiyyətini xüsusilə vurğulayıblar.

Sonda tədbiri yekunlaşdıran Rüfət Quliyev tədbirin keçirilməsi və yaradılan şərait üçün Lənkəran Şəhər İcra Hakimiyyətinin başçısı Taleh Qaraşova təşəkkürünü bildirib, qeyd edib ki, gələcəkdə də belə görüşlər mütamadi olaraq keçiriləcək, festivallar, sərgilər, təcrübə mübadilələri təşkil olunacaq.

Görüşdən xoş təəssüratla ayrılan qonaqlar “Lənkəran Çay-5” Çay fabrikində əkin və istehsal sahələrinin işi ilə də tanış olublar.

Media-tərəfdaşlar: We&WorldEconomics iqtisadi jurnalı, CBC televiziya kanalı, ITECACaspian.

WeClub layihəsi haqqında: WeClub adlı biznes klubu kiçik və orta bizneslə məşğul olan sahibkarlar üçün We&World Economics iqtisadi jurnalı tərəfindən təsis edilmişdir. Klubun missiyası iş adamlarını yeni bazarlara, yeni sərhədlərə daxil etmək, iştirakçıları faydalı məlumatlarla zənginləşdirmək, həm kiçik, həm də böyük bizneslə məşğul olan yerli və xarici tərəfdaşlarla qarşılıqlı münasibət yaratmaq üçün şərait yaratmaqdır. Biz əminik ki, bizim klub sahibkarlar arasında təcrübə mübadiləsi və biznesin inkişafı üçün faydalı tədbirlərin keçirilməsi üçün əla platforma olacaqdır. Klub üzvlərini maraqlı insanlar, biznes təlimləri, aparıcı ekspertlərin məruzələri, həmkarları ilə ünsiyyət, yeni tanışlıqlar və görüşlər gözləyir.

Kiçik biznes sahibkarlarının iş dünyasına inteqrasiyasına təşviq edərək, biz həmçinin bu layihədə böyük işgüzar nümayəndələrin iştirakı ilə onların məqbul insanlar, böyük və güclü tərəfdaşlar olaraq Azərbaycanda əlverişli iş mühiti yaratmaq və inkişaf etdirməkdə təkliflərini gözləyirik; Biz həmişə dialoqa və qarşılıqlı faydalı tərəfdaşlığa açığıq.

Əlavə məlumat üçün:

info@wem.az